भड्किएका आत्मा

कबिता-भड्किएका आत्मा

भड्किएका आत्मा, कड्किएका आत्मा
कतै कतै तर्किएका आत्मा ।

परमात्माको खोजीमा,
नर्कको बाससँगै अड्किएका आत्मा ।

ज्युँदो हुँदा गुन्द्रि नपाएको,
मरे पछि पलङ्गको आशमा,
मडारिएका आत्मा ।

आन्द्रा सुकेका, मान्द्रा छुटेका,
आज पिण्डको खोजीमा,
रन्थनिएका आत्मा ।

थरी थरीका जातमा,
मरी मरीका आत्मा ।

उद्धारको चटारोमा,
पितृ पक्षमा टाउको मुण्ड्याई,
व्याञ्जन झुण्ड्याई,
पिण्ड लडाई,
झुक्किरहेका आत्मा ।

लखतरान भई,
पुस्तादर पुस्ता,
सन्तानदर सन्तान,
भड्किरहेका आत्मा ।
भड्किरहेका आत्मा ।।

लेखक-उदय मैनाली

प्रकाशित मिति: २०२२-०९-०९ , समय : १९:०७:२० , २ वर्ष अगाडि