झापा एक्सप्रेस , ३५७७ पटक हेरिएको
झापा गाउँपालिकाले आफ्नो क्षेत्रमा रहेका तीन सामुदायिक माध्यमिक विद्यालयमा अध्ययनरत कक्षा ११ र १२ का ३९५ जना विद्यार्थीलाई झण्डै ४३ लाख रुपैयाँ बराबरको छात्रवृत्ति वितरण गरेको छ।
शुक्रबार पालिकाको सभाहलमा आयोजित विशेष कार्यक्रममा डिल्लीराज मावि, जनकल्याण मावि र जनता माविका विद्यार्थीलाई छात्रवृत्ति प्रदान गरिएको हो। कार्यक्रममा कार्यवाहक अध्यक्ष अन्जुदेवी थपलियाले छात्रवृत्ति वितरण कार्यक्रम गाउँपालिकाको नीति र दृष्टिकोणअनुसार अघि बढाइएको जानकारी दिइन्।
“कसैलाई पनि उच्च शिक्षाबाट बञ्चित हुन नदिन गाउँपालिकाले छात्रवृत्ति, साइकल वितरणजस्ता कार्यक्रम निरन्तर सञ्चालन गर्दै आएको छ,” अध्यक्ष थपलियाले भनिन्। “शिक्षा, स्वास्थ्य र कृषिलाई पहिलो प्राथमिकतामा राखेर पालिका अघि बढिरहेको छ, यसको प्रभावकारी कार्यान्वयनमा सबैको भूमिका महत्वपूर्ण छ।”
प्रमुख प्रशासकीय अधिकृत गजेन्द्र थपलियाका अनुसार, कक्षा ११ मा अध्ययनरत विद्यार्थीलाई जनही ९ हजार २ सय ५० रुपैयाँ, कक्षा १२ मा अध्ययनरतलाई जनही ११ हजार २ सय रुपैयाँ र बाली बिज्ञानजस्ता प्राविधिक धारमा अध्ययनरतलाई जनही १२ हजार रुपैयाँका दरले छात्रवृत्ति वितरण गरिएको हो।
शिक्षा शाखा प्रमुख जीवन ढकालका अनुसार, डिल्लीराज माविमा कक्षा ११ का ५७ र कक्षा १२ का १३६ विद्यार्थी छन्। जनता माविमा साधारण धारतर्फ कक्षा ११ का ४५ र कक्षा १२ का १०६ विद्यार्थी रहेका छन् भने प्राविधिक धारतर्फ कक्षा ११ का १० र कक्षा १२ का ९ जना छन्। त्यस्तै, जनकल्याण माविमा कक्षा १२ मा अध्ययनरत ३२ विद्यार्थीलाई पनि छात्रवृत्ति प्रदान गरिएको हो।
कार्यक्रममा वडा अध्यक्ष राजकुमार यादव, शशीचन्द्र ठाकुर, गाउँ शिक्षा समिति सदस्य सुन्दरलाल गणेश, नेपाल शिक्षक महासंघ झापा गाउँपालिका अध्यक्ष जगन्नाथ राजवंशी, सचिव टीका प्रसाद कट्टेल लगायतले शुभकामना मन्तव्य राखेका थिए। कार्यक्रममा विभिन्न वडाका जनप्रतिनिधि, शिक्षक, अभिभावक र विद्यार्थीहरूको उल्लेखनीय सहभागिता रहेको थियो।
प्रकाशित मिति: २०२५-०४-०५ , समय : १९:४२:१० , १७ घन्टा अगाडि