झापा एक्सप्रेस , ४००३९ पटक हेरिएको
निरन्जन मैनाली
मदरगाछ-झापाको झापा गाउँपालिका-७ स्थित साउथ होराइजन अंग्रेजी माध्यमिक विद्यालयले अभिभावकहरुको सम्मान गरेको छ।विद्यालयले आफ्नो विद्यालयमा अध्ययन गरेर एसईई परिक्षामा उत्कृष्ट अंक ल्याएर सफल भएका विद्यार्थीहरुका अभिभावकहरुलाई प्रशंसापत्र,मायाको चिनो र खादाद्वारा सम्मान गरेको हो।
सोमबार विद्यालयका प्रधानाध्यापक नवराज सुवेदीको अध्यक्षता र झापा-७ का वडाध्यक्ष सखीचन्द्र ठाकुरको प्रमुख आतिथ्यतामा १४ जना अभिभावकहरुलाई सम्मान गरिएको हो ।
कार्यक्रममा प्रमुख अतिथी ठाकुरले विद्यालयले प्राविधिक शिक्षामा जोड दिनुपर्ने बताउनुभयो। “अबको आवश्यकता प्राविधिक शिक्षामा जोड दिनु हो,विद्यार्थीलाई जस्तो बनायो त्यस्तै बन्ने हुन् “उहाँले भन्नुभयो ।
शिक्षक रेवत ढुंगानाले संचालन गरेको कार्यक्रममा वडासदस्य बालकृष्ण सिटौला ,विद्यालयका शिक्षक अभिभावक संघका अध्यक्ष शिवराज बानियाँ लगायतले शुभकामना मन्तव्य राख्नुभएको थियो ।
उक्त विद्यालयमा अध्ययनरत १४ जना विद्यार्थीले २०७९ सालको एसईई परीक्षा दिएका थिए जसमा सबैले उत्कृष्ट नतिजा ल्याएर सफल भएका थिए ।
प्रकाशित मिति: २०२३-०८-१४ , समय : २०:५७:५४ , १ वर्ष अगाडि